अज्जकल में चैन खरीदी लेदा ऐ
हून में गलत पासेआ गड्डी अग्गें लेई जाने आह्ले ड्राईवर गी
किश नेईं आखदा
बस्स, मुहां उप्पर इक्क हारी दी मुस्कराह्ट
लेई औना।
हून में उस शोह्दे नौजुआन गी
दिक्खियै बी नेईं दिखदा
जेह्ड़ा मेरै सामनै गै
कुड़ी कन्नै बदतमीजी करियै
सीटी बजांदा निकली जंदा ऐ।
हून में जोरें-जोरें करलाइयै
भाशन देने आह्ले मजमे-बाज नेता दी
कोई गलती नेईं कड्डदा
में अपने दोस्त नेईं गोआने
जेह्ड़े उस नेता दे भगत न।
हून में चलाकी, झोलीचुक्की ते
मक्कारी दियां पौड़ियां चढ़ियै
समाज च बड्डे बने दे लोकें गी
नेईं भंडदा
सगों उ’नें गी हत्थ जौले करियै
नमस्ते करना ते
मौका मिलै ते उ’नें गी इज्जत-आदर ते मान
बी दिन्नां।
चैन खरीदने आस्तै में अपना जमीर बेचेआ
जमीर में सस्ता गै बेचेआ
उ’नें नेताएं दे जमीर थमां बी सस्ता
जेह्ड़े ई.डी. दी रेड थमां बचने आस्तै
रातो-रात इक्क पार्टी चा दूई च छाल मारी दिंदे न
ते
उं’दे जमीर कोला बी सस्ता
जेह्ड़े उ’नें गी गले लाई-लाई
अपनी पार्टी च शामल करदे न
जि’नें गी ओह् उमर भर गालां कड्डदे रेह।
हून मिगी बड़ा चैन ऐ
जद् मेरे कोल जमीर गै हैनी
ते फ्ही चैन गै चैन ऐ।
—————————————
