रास मिली गेई तेरी-मेरी ओ पीड़े
जीनै तांईं तूं गै बत्हेरी ओ पीड़े।
कन्नै सोऐं ते कन्नै जागैं मेरै
तूं गै छंदें बिच तूं गै रागैं मेरै
मेरे शब्दें च रक्स नित करनी ऐं तूं
निं थोह्ड़ किसै दी तूं ऐं भागैं मेरै
तूं चिनग अ’ऊं लाखै दी ढेरी ओ पीड़े
रास मिली गेई तेरी-मेरी ओ पीड़े।
में खोह्ल्ली दी ऐ गिरहा-गिरहा तेरी
जे तूं मीरा ऐं तां अ’ऊं बिरहा तेरी
पानी च रवानी जि’यां उ’आं मेरे च तूं
जे तूं मुद्दा ऐं तां अ’ऊं जिरहा तेरी
तूं मेरी अ’ऊं दर्दन तेरी ओ पीड़े
रास मिली गेई तेरी-मेरी ओ पीड़े।
तेरे जेही र्होल निं होर कुतै होनी
अ’ऊं नदिये दी कुक्ख आं तूं डुबदी सोनी
लोकाई तेरे शा न्हक्क त्रांह्दी ऐ
मी सोह् तेरी मी लग्गी तूं मनमोह्नी
अ'ऊं भखन तूं धुप्प घनेरी ओ पीड़े
रास मिली गेई तेरी-मेरी ओ पीड़े।
अ’ऊं तेरी पीड़े तूं सदियें शा मेरी
जे तूं अल्लेआ ते अ'ऊं जन्न तेरी
इक थाह्न बिजन हीलै सल्ल असें झल्ले
जन्न तुगी होंदै तड़फी जन्न बत्हेरी
पीड़ सदा मेरी तूं भलेरी ओ पीड़े
रास मिली गेई तेरी-मेरी ओ पीड़े
जीनै ताईं तूं गै बत्हेरी ओ पीड़े।
—————————————
