आखदे सारे, ज्ञानी ध्यानी
माह्नू दे, अपने गै अंदर
हीरे-मणियां, लक्ख-करोड़ां
लक्ख कोरजां, सूह्टे उत्थें
अमरत दे, परमानन्दै दे
लक्ख-करोडां, सूरज उत्थें
लिक-लिक, मारन लशकारे
जेह्का जाई, पुज्जदा उत्थें
अनलहक दियां, किलकां मारे।
सुनी-सनाई, गल्लां मन्नियै
कदें-कदें में, न्होइयै धोइयै
मुरशिद अग्गें, सीस नोआइयै
मत्थे उप्पर, टिक्का लाइयै
ताड़ी लाइयै, जतन में करनां
जाई बड़ां में, मने दे मंदरे।
कुत्थुआं जां, कक्ख निं भाखा
न कोई रस्ता, न दरोआजा
शशोपंज, में बनी बतूह्रा
दिक्खदा रौंह्नां, दिक्खदा रौंह्नां
दिक्खदे-दिक्खदे, खौरे कुत्थुआं
चानचक्क कोई, भित्ती खुलदी
जिसदे अंदर, बड़ा गै न्हेरा
न्हेरे अग्गें, होर बी न्हेरा
बड़ा सन्नाटा, बड़ा गै न्हेरा
इस विकराल, सन्नाटे दे बिच्च
जि’यां-जि’यां, अग्गै बधनां
तन-मन मेरा, कंबदा जंदा
गला मेरा एह्, सुकदा जंदा
मेरा सब किश, मुकदा जंदा
न्हेरे दा कोई, ऐंत निं लभदा
न कोई दिया, सूह्टा लभदा
इ’यां स्हेई होंदा
अग्गै होर बी, डूंह्गियां खाइयां
अग्गै होर बी, न्हेरे दे घेरे
होई सकदा, इं’दे गै अग्गें
बलदे सूरज, मणियां-हीरे।
पर में बड़ा गै डरे हुट्टे दा
बिंद बी अग्गै बधी निं सकनां
परसो-परसा, कंबदे-कंबदे
परतोई जन्नां, में खुंझी जन्नां।
एह् किन्नें जरमें शा होआ दा
किश भेत निं पौंदा
प इं’या बझोंदा
एह् खुंझनें दा सिलसिला
उन्नां गै पराना ऐ जिन्नां ऐ ब्रह्मांड
ते में बी खौरे उन्नां गै।
————————————
