झुनक करांदे न मी
बचपुनै दे ख्याल
ओह् लीरें दा रमाल
रमालै च ब’न्ने दा सुखने दा गलाल
जानी,पत्थरें दी मैंह्दी
ते मैंह्दिये दे भ्याल,
ओह् नड़ियें दी काह्न्नी
ते कालखू दी स्याही
ओह् धुड़ुऐ दे लेप
पट्टियै प लाई
ओह् हांबी-हांबी
ताईं-तुआंही तक्कना
ते सलेटिये गी भन्नी
झट जीह्बै हेठ रक्खना
ओह् सलेटिये दा सुआद
ते गाच्चनियें दी कश्वो
अजें बी निं भुल्ले मी
सच ऐ तेरी सोह्
ओह् चि’ऊंकलिये दे झूटे
ते गिट्टियें दा खलार
ओह् बुटुऐं दे फड़के ते
कुरतुऐ दा लंगार
ओह् खिल्लरे दे बाल
ते जुएं दी भरमार
ओह् इक गैंऽ धरती पर
ते दुआ छड़प्पा गास
निक्के-निक्के पैरें च
ओह् अंबरै दी आस
समें दे कन्नै-कन्नै अपनी ओह् चाल
झुनक करांदे न मी बचपुनै दे ख्याल।
———————————————
