बरसांती दियां घनियां एह् धूरां
औं दिक्खी-दिक्खी बत्त नित झूरां
चेते तेरे गै चौह्नी पैहरें जोगिया
औं धारें-धारें तुप्पनियां तुगी
तूं गोजी गेआ शैहरें जोगिया।
कुत्थै जाई तूं नमी धूनी लाई
केह्ड़ी बत्ता दा बनेआ ऐ राही
तूं ङारें प नंगे पैरें जोगिया
औं धारें-धारें तुप्पनियां तुगी
तूं गोजी गेआ शैह्रें जोगिया।
तेरे कलशे च हिरख में डोबे दा
एह् मन चित तेरे बिच गोजे दा
न्हेरे छाए न दपैह्रें जोगिया
औं धारें-धारें तुप्पनियां तुगी
तूं गोजी गेआ शैह्रें जोगिया।
तूं तपें कन्नै तुप्पना ऐ जिसगी
औं तेरे बिच तुप्पनी आं उसगी
कच्चा दिल घड़ेआ घमैरें जोगिया
औं धारे-धारें तुप्पनियां तुगी
तूं गोजी गेआ शैह्रें जोगिया।
में मिगी बी तुप्पेआ बत्हेरा
मिगी लब्भा निं मेरा बसेरा
औं फिरेआ ऐं चफेरै जोगने
तूं थाह्रें- थाह्रें तुप्पनी ऐ मिगी
औं गुआचा बिच मेरै जोगने
कोई थां निं बसोने ताईं लब्बी
सूल बिरहा दी मन चित लग्गी
मेरा होना मी बतेरै जोगने
तूं थाह्रे-थाह्रें तुप्पनी ऐ मिगी
औं गुआचा बिच मेरै जोगने
औं अपनी गै होंदै दा रोगी
औं अपनी गै तपाशै दा भोगी
कुन मेरै बिच मी फेरै जोगने
तूं थाह्रें-थाह्रें तुप्पनी ऐ मिगी
औं गुआचा बिच मेरै जोगने
कु'न खावै ते कु'न नित भोरै
रुग्ग तसि'यें दे भरे न कटोरै
तूं लोई ते औं ऐ न्हरै जोगने
तूं थाह्रें-थाह्रें तुप्पनी ऐ मिगी
औं गुआचा बिच मेरै जोगने।
—————————————
