मते अंदर ते किश, बाह्रै इ’यै तकरार होंदे न
बदलदे मौसमें,दरकार किश बदलाव होंदे न
मनुक्खी जीवनै दे राज गैह्रे समझ शा गैह्रे
कोई सुच्चा कोई भिट्टा नेईं होंदा, छड़े हालात होंदे न।
ज़माना साज थ्होड़ी बन, कुड़े तूं हेज थोह्ड़ा ला
कटहल, अरबी जे छिल्लनी तैं, तां हत्थें तेल कोड़ा ला
एह् हास्से फुम्मनियां पाइए नूहारं रौनकी करङन
एह् खिट्टो-खिट्ट नस्सी जाऽ दुआसी गी मरोड़ा ला।
केह् भिड़ने दे ते लड़ने दे बी, किश आदाब होंदे न
उ’यै समझन, उ'यै जानन जो, बा किरदार होंदे न
मेरे नैने समीना नीं मेरे हृदय दी कोरज नै
नज़र दे जावियें भामे, बड़ी सगात होंदे न।
ओह चेतेँ इच र'वै सजरा, जिसी माह्नू भलांदा ऐ
जो हासल नि ओह निर्मोही, इशारै नै बलांदा ऐ
गुफ़ा गैह्री दे आंह्गर जी ऐ मौसम पालें धुंधे दे
बछोड़ा लाडला आइयै तुसे गी लाड लांदा ऐ।
ओह् अपने-आप नै मिलने दे पल किश खास होंदे न
दना हास्से, मते रोसे भरी परात होंदे न
नजरंदाज करियै लक्श ते किश साधने पोंदे
एह् निश्चें दे खज़ाने गै जी सच्ची रास होंदे न।
——————————————————
