कदें कदें
पोह् दी ठंडी रात, कोई चौथे पैह्र
जिल्लै, कोह्रे दी बुक्कल मारियै
सब किश, धुंधला करी दिंदी ऐ
चानचक्क, में घाबरियै उठ्ठी पौना
खौरे, कुसे डरौने सुखने शा जागियै
ते बसुरत जन्न, दिक्खदा रौहनां
एह् कोह्रा
ते तुप्पदा रौह्नां, इं’दे च अपना-आप
अपनी नियति, अपने होने दे मैह्ने।
फ्ही कोई हस्सियै, मिगी आखदा
मूरखा, जेह्का मिलदा अंतर समंदरै च
उसी तूं तुप्पदा फिरना, बाह्र
ओह् बी, कोहरे दे बवंडरै च।
प जिसलै तुप्पन में जन्नां, अपने गै अंदर
उत्थै बी घुप्प न्हेरा, घने कोह्रे दा बवंडर
बड़ा में जतन करनां, प अग्गें बधन निं होंदा
अपनें गै अंदर अपने-आपै ने मिलन निं होंदा
एह् बाह्रला कोह्रा कदें छंटोई बी जंदा ऐ
पर अंदर दा कोह्रा कदें बी घट्ट निं होंदा
मिगी अपने गै होने दा कुतें सबब निं थ्होंदा।
——————————————————
