ङार चेतें दे कठेरी धड़कनें दी ङीठिया
कालजै दे बर्फ ठंडे-ठार कुप्पड़ घालचै
नफ़रतें दे जाड़ ठारां उम्र सारी सेकियां
तांह्ग-बस्ती आ घड़ी-भर हिरख-लोह्ड़ी बालचै।
जां मठोंदे जिंदगी दे हिरख-निग्घै सिलसिले
ठार चेती जां सुआसें, मौत आले मारदी
धड़कनै'तै, सोह्ल सीनै, हिरख सेका लाजमी
ठार-पिंडा, खून जिट्टा, जिंदगी निं स्हारदी।
दोस्ती दी कुन्निया जे दुश्मनी गी गालना
ड्हान सीनै हीखियें दी अग्ग कैह्ली स्हालचै।
उम्र कुसने भोगी ऐ, जां उम्र कुसने भोगनी
चार-साहें भार चाएं दा सबूरा स्हारना
सोह्ल-पैरें खीर पौने मौत कंडे तालने
जीन-पैंडा होर पोटें भार किन्ना मारना।
जे सखाला पैर पाना जिंदगी दी गैह्लिया
आ बछाचै फुल्ल कूले, खुंघ-कंडे तालचै।
जीन कोठी, मौत-बूहे रोज़ चेचे खोह्लियै
मस्स काले नाग अंदर बाड़ने औखे मना
यार चाढ़ै, पीड़-चु'ल्ली साह्-बस्हाठी ठोह्रियै
जीन कुन्नी चाऽ सबूरे काढ़ने औखे मना।
जीन-खातर चाऽ मने दे काढ़ने तूं छेकड़ी
छेकड़ी जे काढ़ने तां आ सबेल्ला काढ़चै।
कर कलेजा प्हाड़ जेकर इश्क सीनै पालना
इश्क चमड़ी कोड़दा जां मास हड्डें खोरदा
काह्लिया दी थाह्र पोटा रक्ख मासा तूं मना
इश्क सीनै पालना तां सबर डाह्डा लोड़दा।
इश्क लांदे'लै ‘बगान्ना' एह् कुसै निं सोधेआ
ङार नैनें तालचै जां प्हाड़ सीनै पालचै
नफ़रतें दे जाड़ ठारां उम्र सारी सेकियां
तांह्ग-बस्ती आ घड़ी-भर हिरख-लोह्ड़ी बालचै।
———————————————————-
