बुरें कम्में दी लीह्ऽ चलाई चंगा करना मित्थेआ नेईं
करनीं सनां उस माह्नू दी जि’न्न केह्रापन सिक्खेआ नेईं
निक्कें-मुट्टें दा नरोआ कम्म कि’यां नाह्ड़े हत्थें लमका दा
दफ्तरै दा बिन्दू साढ़ा दिक्खो कि’यां लासां मारी चमकै दा।
कमलै दी धार बड़ी पैन्नी जिसदा नेईं कोई मेल
जिस चरस्तै फिरै उस्सै बक्खी डुल्लै दा हाहाकार दा तेल
घर-घर इसदा कस्सरी तड़फी-तड़फी थां-थां त्रबका दा
दफ्तरै दा बिन्दू साढ़ा दिक्खो कि’यां लासां मारी चमकै दा।
नीचता दी जीऽ हजूरी करने आह्ला इसी मनुक्ख लोड़चदा
झूठालड़ लड़ लग्गने दा सच्चे माह्नू गी दुख मसोसदा
झोल्लीचुक्क झूठा कपटी मस्का लाने गितै अग्गै-अग्गै ढलका दा
दफ्तरै दा बिन्दू साढ़ा दिक्खो कि’यां लासां मारी चमकै दा।
भुक्खी शकीनी बोजै गाजरां कन्नै इसनै लालची मन बनाया
लुब्ब-लालचै भरी भरोइयै बेईमानी गी अपनै घर बसाया
एह्दी भैड़ी करनी थमां हर कोई तांह्-तोआंह् फड़का दा
दफ्तरै दा बिन्दू साढ़ा दिक्खो कि’यां लासां मारी चमकै दा।
बनांदा रिश्वत दा ढौंग सबल्ला होरनें गी सारें सत्ती चिढ़कै दा
स्यानपुनें दा कमाल दिक्खो बाह्रो-बाह्री हिस्सा लैने गित्तै रिढ़कै दा
जो चाढ़ै मौठें गी तेल ओह् दूएं पर ठमका दा
दफ्तरै दा बिन्दू साढ़ा दिक्खो कि’यां लासां मारी चमकै दा।
दूर दरेडै ओह् छंडोआ खड़ी-खट्टा जिन्न चुक्की अबाज
निंबल होंदे सती बद्दल घनौंदे स्याह काला दिस्सदा गास
खुइयै रोजी रूट्टी घर-घृस्ती जुआड़ी हस्सी-हस्सी ढमका दा
दफ्तरै दा बिन्दू साढ़ दिक्खो कि’या लासां मारी चमकै दा।
जमदूत दी नंगी तलवार बनियै लोकें उप्पर लड़कै दा
हुट्टी हारी निहत्थे होइयै हर कोई मच्छी सांई छड़कै
सालें बद्दी इक्कै थां मारी पलेसना सप्पी सूकां सुनका दा
दफ्तरै दा बिन्दू साढ़ा दिक्खो कि’यां लासां मारी चमकै दा।
——————————————————————
