ढलदी उमर

उमर हुन ढला करदी ऐ 
मिट्टी एह्दी गला करदी ऐ 
रोइयै गुजरी जां हस्सियै गुजारनी 
एह्दा स्हाब करा करदी ऐ। 

दुक्ख, कसाले, जिम्मेवारियां 
सब किश पास्सै धरा करदी ऐ 
जीने दियां मोहलता मंगा करदी ऐ 

आखदी उमरा गी राह्‌ना ऐ 
अंदरौ अंदर बला करदी ऐ 
शौक जीने दे रक्खियै
 पैंसल अपनी घड़ा करदी ऐ। 

केह् पाना ते केह् पाई लेदा 
बड्डियें सोचैं तरा करदी ऐ । 
पलें दी इसगी खबर नेईं 
पर पौड़ी-पौड़ी चढ़ा करदी ऐ।

बकत ते दित्ते हादसे कन्नै लड़ा करदी ऐ
अपनी सोचें दी पट्टी चड़ा करदी ऐ
ञ्याणी जिद्दै कन्नै समझौते करियै
उमर हुन ढला करदी ऐ। 
 .