एह् ब्हार कैसी
आई ऐ ऐगती एह् ब्हार कैसी ऐ कुदरत दी खौरै एह् कार कैसी ऐ? सैह्में दे बूर ते सैह्के दे फुल्ल चिंता भरोची दी कायनात कुल्ल हिस्सी दी सब दी एह् नुहार कैह्सी कुदरत दी खौरै एह् कार कैसी ऐ? बैठे दे सारे गै…
Inderjeet Kesar
Writer
आई ऐ ऐगती एह् ब्हार कैसी ऐ कुदरत दी खौरै एह् कार कैसी ऐ? सैह्में दे बूर ते सैह्के दे फुल्ल चिंता भरोची दी कायनात कुल्ल हिस्सी दी सब दी एह् नुहार कैह्सी कुदरत दी खौरै एह् कार कैसी ऐ? बैठे दे सारे गै ब्हेड़ियै भित्त बेरौनकी ने बी पाई दी छित्त दुआसी बिछी एह् थाह्र-थाह्र कैसी कुदरत दी खौरै एह् कार कैसी ऐ? दफ्तर, स्कूल बी कोई नियों जंदा बंद गै पेदा ऐ हर कोई धंदा छुड़की गे सब कारोबार कैह्सी कुदरत दी खौरै एह् कार कैसी ऐ? खाल्ली न सिड़कां ते सुन्नियां न गैह्लां बाजे, नां गाजे, नां सुनचन कैह्लां किट्ठे निं माह्नू कुतै चार कैह्सी कुदरत दी खौरै एह् कार कैसी ऐ? दोस्ती निभै दी, नां रिश्तेदारी सारें दी जोकी ऐ दशा न्यारी डरै नै म्हिसै दा मनैं प्यार कैह्सी कुदरत दी खौरै एह् कार कैसी ऐ? खुशी ऐ ओह्की नां गमीं ऐ ओह्की चमक ऐ अक्खीं नां नमीं ऐ ओह्की बुज्झै दा माह्नू मनै भार कैह्सी कुदरत दी खौरै एह् कार कैसी? फिरै दा माह्नू होई डौर-भौरा डरै दा दिक्खियै अपना गै छौरा समझ निं आवा दी एह् सार कैह्सी कुदरत दी खौरै एह् कार कैसी? ढवै दे तगड़े बी अज्ज इस खाड़ै समां बी सारें गी डाह्डा पछाड़ै होआ दे जिगरे तार-तार कैह्सी कुदरत दी खौरै एह् कार कैसी? चढ़े दे हाड़ा च डोल्लै दी किश्ती भले-भलोकें गी रोलै दी किश्ती आवै निं हत्थै च पतवार कैह्सी कुदरत दी खौरै एह् कार कैसी? सज्जनो, कर्में दी स’जा ऐ खबरै मालक दी ‘केसर’ रज़ा ऐ खबरै जीवन दी होऐ एह् हार कैसी कुदरत दी खौरै एह् कार कैसी? ………………………
About the Author
Inderjeet Kesar 25 articles
Inderjeet Kesar, born on 09 Oct. 1946 at Katra. Married to Savitri Kesar and have two children. Worked at Civil Secretariat on various positions, retired as Deputy Secretary ( KAS Officer ) on Oct. 2004. Started writing in Dogri in 1967, have been publishing a book every year since 1998. Till 2020 have published 23 books and received Sahitya Akademi Award on Novel ‘Bhagirath’ in 2018.
View all articles →