एह् मेरे गीत केह् दस्सां
एह् मेरे गीत केह् दस्सां केह्ड़ी कुक्खें दे जाये न केह्ड़ी रातें दे एह् जुगनू केह्ड़े रुक्खें दे जाये न। छाती धरत दी जि’यां भरोचे बलदे लावे ने चपासे जिंदगी दे अड़िये मौती दे कलावे ने किश जीने दियां…
V
Vikas Mangotra
Writer
एह् मेरे गीत केह् दस्सां केह्ड़ी कुक्खें दे जाये न केह्ड़ी रातें दे एह् जुगनू केह्ड़े रुक्खें दे जाये न। छाती धरत दी जि’यां भरोचे बलदे लावे ने चपासे जिंदगी दे अड़िये मौती दे कलावे ने किश जीने दियां रमजां किश दुखें दे जाये ने एह् मेरे गीत केह् दस्सां केह्ड़ी कुक्खें दे जाये ने। किश धुखन सोचें दी किश हड्डें दा बालन किश ताप ल्हुये दा किश मांसै दा सालन भटकन जरमें-जरमें दी केह्ड़ी भुक्खें दे जाये ने एह् मेरे गीत केह् दस्सां केह्ड़ी कुक्खें दे जाये ने। किश सागरें दी डुंग्हाई होंदे ने मिलने दे हीले चन्न तारें दे लिशकारे उच्चे गासें दे वसीले चानन जां न्हेर केह् दस्सां केह्ड़े पक्खें दे जाये ने एह् मेरे गीत केह् दस्सां केह्ड़ी कुक्खें दे जाये ने। त्रेलू दे कोई मोती भरी धुप्पें मरी जंदे अक्खें दे कोई टोये डुसकी डुसकी भरी जंदे है सच्ची वेदना कोई जां मरहक्खें दे जाये ने एह् मेरे गीत केह् दस्सां केह्ड़ी कुक्खें दे जाये ने। किश खेड विधना दी किश लकीरें दे तमाशे ने किश खुंदकां खिंझां किश अत्थरूं किश हास्से बुज्झै कोई सारतां कियां एह् मनुक्खें दे जाये ने? एह् मेरे गीत केह् दस्सां केह्ड़ी कुक्खें दे जाये ने। मेरे गीतें च अड़िये किश बी ते मेरा नेईं एह् मेरे गीत सांझे ने इं'दे च तेरा मेरा नेईं सरबंध पिछले जरमें दे जां भविक्खें दे जाये ने एह् मेरे गीत केह् दस्सां केह्ड़ी कुक्खें दे जाये ने। ——————————-
