जीवन -काल
जीवन-काल बधा दा अग्गें सुरें-बेसुरें, ताल-बेतालें एह्का ताल ता-थेइएं गाना भरमें किश भलेखें जाना साज़िंदें दी ठोकर खाइयै साज़ कदें बी सुरें नेईं रलदे कोह्दी डफ़ली,केह्ड़ा राग हर साज़ दे अपने भाग…
Promila Manhas
Writer
जीवन-काल बधा दा अग्गें
सुरें-बेसुरें, ताल-बेतालें
एह्का ताल ता-थेइएं गाना
भरमें किश भलेखें जाना
साज़िंदें दी ठोकर खाइयै
साज़ कदें बी सुरें नेईं रलदे
कोह्दी डफ़ली,केह्ड़ा राग
हर साज़ दे अपने भाग
खिच्च-त्रूड़ ते पेदी रौह्नी
सुरें नै पर नेईं बैर-बखोध
थांह्-थांह् सुर सजांदी रेही
भामें धिङोजोरी सेही
जीवन-काल बधा दा अग्गें
सुरें-बेसुरें, ताल-बेतालें
कदें बझोंदा भलेआं अपना
पलै हारी एह् सत्त बगान्ना
दुख कसाले फेरा पांदे
फ्ही खुशियें लेई थां बनांदे
कदें प्यारा फुल्लें आह्ङर
कदें कंडें मंझ जकोए दा
सूतर -सूतर कतोए दा
फ़र्जें हेठ दबोए दा
जीवन-काल बधा दा अग्गैं
सुरें-बेसुरें, ताल-बेतालें
मरुथलै च फिरदा रौंह्दा
इक्कला-मुक्कला, आप-मुहारा
भाव-रैह्त,रेतु दा कण एह्
सड़दा-बलदा धुप्पै रोज
उड़दा-फिरदा अंधी कन्नै
कदें बनांदा टीले बड्डे
खड़वातै दे हत्थ चढ़े दा
टीलें शा फ्ही होंदा समतल
जीवन-काल बधा दा अग्गैं
सुरें-बेसुरें, ताल-बेतालें
इक जीवन इच्च किन्ने जीवन
इस्सै चाल्ली चलदे रौह्ने
कदें बझोने इतर -फलेल
कदे-कदें एह् खलदे रौह्ने
आसां-मेदां, सुखने किन्ने
किरमिर-किरमिर किरदे रौह्ने
गंढ-त्रुप इक थांह् दा करनी
दुए थांह् दा छिरदे रौह्ने
जीवन-काल बधा दा अग्गें
सुरें-बेसुरें, ताल-बेतालें
एह्का ताल ता-थेइएं गाना
भरमें किश भलेखें जाना।
About the Author
Promila Manhas is known for her poignant style of writing. She has represented Dogri in many National Poetic Symposia. Apart from being a poet of repute she is a newscaster cum translator with Akashwani Jammu. Professionally, she is working with the Department of School Education of the UT of J&K as Lecturer in Botany.
View all articles →