मजबूर
खुद-मुख्तेआर कोई बेशक जरूर ऐ समें कन्नै चलने गी माह्नू मजबूर ऐ । समें गी ते आदमी निं कदें छली सकेआ अक्ख दस्सी इसगी निं कोई चली सकेआ दोशी होऐ भाएं जां फ्ही बेकसूर ऐ समें कन्नै चलने गी माह्नू मजबूर ऐ…
Inderjeet Kesar
Writer
खुद-मुख्तेआर कोई बेशक जरूर ऐ
समें कन्नै चलने गी माह्नू मजबूर ऐ ।
समें गी ते आदमी निं कदें छली सकेआ
अक्ख दस्सी इसगी निं कोई चली सकेआ
दोशी होऐ भाएं जां फ्ही बेकसूर ऐ
समें कन्नै चलने गी माह्नू मजबूर ऐ
समां गै खलांदा फिरै कदें-कदें चूरियां
पंड ब’न्नी आह्नदा ऐ कदें मजबूरियां
मेह्नत कराइयै एह् करै चूर-चूर ऐ
समें कन्नै चलने गी माह्नू मजबूर ऐ
समां बस अपनी गै मर्जी दा मालक ऐ
जिसने बी जिंदगी च कीता कदें आह्लक ऐ
फेरेआ ऐ उस्सै गी इस लूर-लूर ऐ
समें कन्नै चलने गी माह्नू मजबूर ऐ
अपने कनून कन्नै दुनिया गी ब’न्नेआ
केसर गमान भलें-भलें दा ऐ भन्नेआ
राजा भाएं रंक होऐ जां फ्ही मजूर ऐ
समें कन्नै चलने गी माह्नू मजबूर ऐ
बिरथा निं गालो यरो भुल्लियै बी समें गी
मान ते सम्मान देओ इक-इक लम्हे गी
छाई जाना जिंदगी च इक नमां नूर ऐ
समें कन्नै चलने गी माह्नू मजबूर ऐ ।
About the Author
Inderjeet Kesar, born on 09 Oct. 1946 at Katra. Married to Savitri Kesar and have two children. Worked at Civil Secretariat on various positions, retired as Deputy Secretary ( KAS Officer ) on Oct. 2004. Started writing in Dogri in 1967, have been publishing a book every year since 1998. Till 2020 have published 23 books and received Sahitya Akademi Award on Novel ‘Bhagirath’ in 2018.
View all articles →