मेरा शैह्र
हुन बी रसदा-बसदा, मेरा शैह्र ते है नां उ'ऐ रंग, ओह् जोश, ओह् चैह्ल-पैह्ल ते है नां? मेरे यार, मेरे मित्तर, मेरे बचपनै दे हानी गैह्लियां, मदान, ओह् शिकल दपैहर ते है नां? कुतै भज्जी ते निं गेदे,…
V
Vikas Mangotra
Writer
हुन बी रसदा-बसदा, मेरा शैह्र ते है नां उ'ऐ रंग, ओह् जोश, ओह् चैह्ल-पैह्ल ते है नां? मेरे यार, मेरे मित्तर, मेरे बचपनै दे हानी गैह्लियां, मदान, ओह् शिकल दपैहर ते है नां? कुतै भज्जी ते निं गेदे, उ'नें कोठें दे बरगे दस्स हां, मेरे दोस्ता, उत्थै खैर ते है नां? बसैंतरै दी रोआन्नी कुतै घटी ते निं गेदी कोई बच्चा बनांदा लेतरू दा मैहल ते है नां? मेरे गीत सुनियै कोई अत्थरूं बगांदा ऐ अजें बी मेरे चेत्ते दी कोई लैह्र ते है नां? अजें बी ओह् भित्ती खु’ल्ली दी रौंह्दी ऐ उस ग’ली दे मोड़ै प ओह् घर ते है नां? बिल्ल-पतौड़ी अजें बी कोठे प औंदी ऐ उ'नें टिब्बें प बडले आह्ली सनैह्र ते है नां? मरूद, ढल्लनां, ओह् निंबू, जम्हीरियें दे बूह्टे ओह् किंब, गरगल, प्यूंदी-काठी बैर ते है नां? अजें बी ओह्दा रोह्-रोस्सा उन्ना गै नां, दोस्ता हिरख नेईं, नां सेही, मेरे नै बैर ते है नां ?
