मेरे गीत
लिखे जो चाननी रातैं, भरी धुप्पैं ते बरसातैं कदें पतझड़, कदें ब्हारैं, कदें लिखे हे बेब्हारैं न मेरे गीत तेरे नांऽ, कुड़े सारे दे सारे। ओह् किश गीत रोस्सें दे, मेरे अत्थरूं मेरे हौके ते किश गीत हास्सें…
V
Vikas Mangotra
Writer
लिखे जो चाननी रातैं, भरी धुप्पैं ते बरसातैं कदें पतझड़, कदें ब्हारैं, कदें लिखे हे बेब्हारैं न मेरे गीत तेरे नांऽ, कुड़े सारे दे सारे। ओह् किश गीत रोस्सें दे, मेरे अत्थरूं मेरे हौके ते किश गीत हास्सें दे, किश वादे, किश धोखे ओह् जेह्के गीत दुनिया ने सुनियै सराहे हे ते किश गीतें दे राहें, असें लाह्म्मे पजाए हे ओह् मेरे गीत खिंझे दे, बचारे हिरखै दे मारे न मेरे गीत तेरे नांऽ, कुड़े सारे दे सारे । किश गीत बच्चे न, हल्लै उज्जा दे, जम्मा दे बड़े हक्के नै मेरे शा हक्क अपना मंगा दे एह् निक्के गीतड़ू मोइये, कोह्दे जम्मे-जाए न केह्ड़ा एह् स्हाब मंगा दे, मेरे बेह्ड़ै आए न किश कंजक रूपैं न, किश बीर-लौंकड़े प्यारे न मेरे गीत तेरे नांऽ, कुड़े सारे दे सारे । जमदे गै मरी गे, जां जेह्ड़े हल्लै उज्जे नेईं ओह् गीत जेह्के मेरे गले तक पुज्जे नेईं लिखने शा पैह्लें गै मेरी काह्न्नी त्रुट्टी गेई जि’नेंगी गाने दी तांह्गा, मेरी जिंद हुट्टी गेई द्हूरे गीत ओह् मेरे, मेरी अक्खें दे तारे न मेरे गीत तेरे नांऽ, कुड़े सारे दे सारे। किश गीत परलोकी, मेरी होंदा ने गाए न किश गीत न नोखे, होमा पैंछी दे जाए न किश गीत नेहे गाइयै, चाह्न्नां मरी में जां सारे गीतें दी वसीयत, तेरे नांऽ करी में जां केह्ड़ी आसैं बैठे दे, कोह्दै लग्गे दे लारे न मेरे गीत तेरे नांऽ, कुड़े सारे दे सारे ।
