नशा

डोगरी संस्था उट्ठी खड़ोती नौजवान बचाना
टीम जम्मू बी अग्गें आई ऐ, नशा हुन मकाना
नशा भाएं कोई बी होऐ साढ़ा म्हेशां बैरी
बल्लें-बल्लें रंगें दे अंदर भरदा बिस्स एह् जैह्‌री
एह्‌दे शिकंजै फसै जेह्‌ड़ा नौजवान समझाना
टीम जम्मू दा इक्कै धैया – नशा हुन मकाना ।

बब्बै कन्नै टब्बर सारा करदा एह् परेशान
दुद्ध ते मक्खन भुल्ली गे न फ्रूटी डाफी जान
फ्ही की आखचै कलेजा खाइयै भूत-प्रेत ते डैन
दवाई बी रज्जी खन्नें अस असर निं करै जवैन
बेहोशी च रʼवै जेह्‌ड़ा होशा उस्सी लाना
टीम जम्मू बी अग्गें आई ऐ, नशा हुन मकाना

मुंह् निं पाचै भुल्लियै बी जालम होंदी चुटकी
बेची-बट्टी घर बी नशा, एह् करांदी कुड़की
नाके लोआना पौने सारै गिज्झै नेईं कोई लाल
हत्थें इंʼदे सभनें फड़काने बैट ते कन्नै बाल
नशे दा लंबड़दार ऐ जेह्‌ड़ा फाटक उस्सी डकाना
टीम जम्मू बी अग्गें आई ऐ, नशा हुन मकाना

नौजवान कुड़ियां बच्चन हरकत एह् गलोनी
हुस्न-जवानी लैओ बचाई परती नेईं एह् थ्होनी
तुंʼदे हत्थैं इज़्जत सारी इस्सी लैओ बचाई
नशा हमेशा पिच्छें लग्गी करदा ई एह् तबाही
एह्‌दी रौनक किश धेआड़े, लगदा फ्ही कलमाना
टीम जम्मू बी अग्गें आई ऐ, नशा हुन मकाना ।

पौआ आखै अʼऊं आं ब्हादुर निग्गर बुढ़की मारां
ठेकें बाह्‌र माढ़े पिच्छें लग्गियां मुलख कतारां
देसी गैलन अपने कन्नै नौजोआन फसांदी
अंग्रेज़ी बोतल अड्डी चुक्की हौली बरेस नचांदी
गुत्थी-भंग नेओला मारकट फूकी अग्ग जलाना
टीम जम्मू बी अग्गें आई ऐ, नशा हुन मकाना

फ्हीम ते गांजा चिट्टा कन्नै, एह् न कैंसर टी-बी
सक्के इंʼदे भैन-भ्राऽ न सिगरट कन्नै बीड़ी
हुक्का इंʼदा फुफ्फड़ लगदा, बुआ इंʼदी झारी
नासें धूं ते बुड़-बुड़ करदी लांदी साह्-बमारी
नौजवान घेरै फसे चड़ेलें कशा बचाना
टीम जम्मू बी अग्गें आई ऐ, नशा हुन मकाना

नशा म्हेशां जिंदु अंदर किडनी गी जाइयै रुक्कै
कन्नै एह्‌दे छाती पीड़ां, फेफड़ा अंदर सुक्कै
पित्ता बक्ख फड़कै, कन्नै जागन गुर्दें पीड़ां
गोडे देन जवाब, कन्नै लटोई जान जगीरां
किन्ने बारी गुर्दे-किडनी-पित्ता हुन कढाना
टीम जम्मू बी अग्गें आई ऐ, नशा हुन मकाना

झूकां छप्पी नौजवाना सूआ निग्गर लान्ना ऐं
अपने ऐब अंदर रक्खी तूं भाई की छपान्ना ऐं
अजें बी मौका समझी जा तूं ऐब लै छड़काई
चार धेआड़े जिंदगी जेह्‌ड़ी, इस्सी लै बचाई
एह् ऐ जालम दुश्मन साढ़ा, इस्सी दूर नसाना
टीम जम्मू बी अग्गें आई ऐ, नशा हुन मकाना ।

माऊ-बब्बै दा फर्ज़ बनदा ञ्याने रस्तै लाने
रक्खी तक्क इंऱदे उप्पर नशें कोला बचाने
किट्ठे मिलियै जाई सुनाचै बंद होऐ बपार
गभरू जवान नशै डुब्बे, रोकै एह् सरकार
नग्गरें-शैह्‌रें नशें विरोधी मिलियै जलूस कढाना
टीम जम्मू बी अग्गें आई ऐ, नशा हुन मकाना ।

नशा छोड़ियै मुंगफली ते गच्चक तुस मकाओ
कन्नै एह्‌दे काजू-बादाम, गुड़ै दी रोड़ी खाओ
छोहारा आखै मिकी बी देओ कन्नै तुस भाई थाह्‌र
बारामासी किन्नू बी कन्नै, केला लमकै दराड़
रुक्ख-कक्कड़ी शुगर फ्री इस्सी मता खलाना
टीम जम्मू बी अग्गें आई ऐ, नशा हुन मकाना ।

समाज दे अंदर कुऱत्थै लिखेआ नशा तुस एह् करो
रक्खी अपनी इज्जत , थोह्‌ड़ा रब्ब कोला बी डरो
एह् किश खत्म कराना कुंडरिया तेरी बी जिम्मेदारी
मुंढा दा एह्‌दी जढ़ घरेड़ी पुट्टी सुऱट्ट बमारी
समाज दे अंदर हर माह्‌नू ही असें ऐ सुनाना
टीम जम्मू बी अग्गें आई ऐ, नशा हुन मकाना
टीम जम्मू दा इक्कै धैया – नशा हुन मकाना ।