रात होई की अज्ज दोआसन

रात होई की अज्ज दोआसन सुनमसान जरो 
सिसकै दा ध्याड़ा की ऐ निम्मोझान जरो। 

जैलदारै दी झारी अज्ज की गुड़की-बुड़की नेईं 
गद्दियें दी शकारन की ऐ सुरकी घुरकी नेईं 
दब्बडुयै पर कोई नेईं आया भाखां लान जरो
रात होई की अज्ज दोआसन सुनमसान जरो। 

पम्मु दी दादी नै अगड़ी कत्थ सनाई नेईं 
बिल्लू गी सुनदे गै तुरत बुआसी आई नेईं 
कुंतो दे ञूरें दे ढली गेदे सरधान जरो
रात होई की अज्ज दोआसन सुनमसान जरो। 

ताऊ शिब्बो दे अज्ज खराह्टे बिंद बी सुनचे नेईं 
ताई बीरो नै खिंझियै जोरें मुंढेआ झुनके नेईं 
लम्बडें दी घोड़ी नेईं हिनकी लगदी राह्न जरो
रात होई की अज्ज दोआसन सुनमसान जरो। 

शौंकू कंघै कन्नै लगदा छपदा आया नेईं 
दरघोने नै पुंडियै विमलो गी जगाया नेईं 
छुपले पैरें विमलो बी नेईं आई चोगान जरो
रात होई की अज्ज दोआसन सुनमसान जरो। 

तारा लोई आह्ला बी चढ़ेआ हिस्से-हिस्से दा
कुकड़ू कुड़ कुड़ करने आह्ला झिस्से-झिस्से दा
चढ़दे सूरजुयै दी फिक्की एह् मुस्कान जरो
रात होई की अज्ज दोआसन सुनमसान जरो। 

चाची बीरों दी मधानी गम-छमबोल्ली नेईं 
चाचू बीरू नै अज्ज बडलै बेड़ी ठोह्ली नेईं
कोई ते बोल्लो गुमसुम की ऐ सारा ज्हान जरो
रात होई की अज्ज दोआसन सुनमसान जरो
सिसकै दा ध्याड़ा की ऐ निम्मोझान जरो। 
———————————————-