सम्मोहन टिक्का

सुनेआ बुधवाणी दे मंदरै च इक हा बावा रौंह्‌दा
ओह्‌दे कोल हा इंद्रजाल दा इक पराना पोथा
जेह्‌दे बिच्च हे केईं तरीके, केईं किस्में दे जैंतर
बशीकरण, मुट्ठ करनी, नेह् केईं किस्में दे मैंतर।

इक दिन उस बावे गी भंग कुसै ने पलाई
ते उसदी जरमें-जरमें दी लेई जैदाद चराई
उस पोथे दे नुस्खे लग्गे मूढ़मत्तें दे हत्थैं
कुसै ने मारे उल्लू-इल्लड़, कुसै ने चित्तरे बट्टे।

इक बड़ा हा आशक नुस्खा, सौखा ते हा निक्का
मेरे मित्तरा दे हत्थ लग्गा, आखदे सम्मोहन टिक्का
उस नुस्खे दी रेस्पी इ’यां-- संदूरै च केला रलाना
पाने लौंग-लाची, न्हाइयै बडलै नेरनै मत्थै लाना
आखदे-- जिस्सी फ्ही दिक्खो, नजर बन्होई जंदी
जो किश आखो उ’ऐ करदा, अकल बतोई जंदी।

उस टिक्के दी महिमा सुनियै गोगा ते लच्छु आए
कुंवर गी आखदे असेंगी दस्सो इश्क-मुशक दे उपाए
झकदे-झकदे उ'नें दौनें गी टिक्का कुंवर ने लाया
लाइव एक्सपेरिमैंट कीता, इ’यां टिक्का अजमाया।

जि’यां टप्पेआ गेट गोगे ने उ’आं गै मंझ रड़ाई
होइयां अक्खां चार, मिटी गेई जरमें दी जुदाई
सच्चें गै इस टिक्के दा जोर बड़ा गै हा भाई
अग्गें-अग्गें गोगा नस्सा पिच्छें जी कालका माई।

अर्जन सिंहा दे गेटा तक बी अजें नेईं हा पुज्जा
आन जी ढाइयै मंझै मारेआ, मुहैं पेई गेआ सोजा
मारी खिट्ट गोगे ने ते बड़ेआ गुस्लखाने च सिद्धा
सत्त बारी फ्ही साबनै कन्नै सम्मोहन टिक्का धोता
खिंझियै फ्ही आखन लग्गा-- मोआ सौह्‌रा टिक्का ।

इन्ने चिरै जी ताई जल्लो कुतै जोरै नै करलाई
भुल्ल भुलेखै लच्छु कन्नै नजर कुतै टकराई
ताई आखदी-- मरी जानेआ, तेरा करां स्यापा
पूरा टब्बर पुनियै छोड़ां, मां गोगे दी ते पापा।

इन्ने चिरै च घर कुसै दे कारक कुसै ने गाई
ताई ने मुंडी ल्हाई, ते जोरै नै फ्ही करलाई
तूं केह् मोएआ, टिक्का लाइयै करना मिगी शदाई
दिक्ख धरोइयै, नजर मेरी तेरे खूनै दी त्रेहाई
कुसै चाल्ली मी अज्ज बचाई लै बाह्‌वे आह्‌ली माई
हत्थ जोड़ियै मिन्नतां करदा लच्छु— ताई-ताई ।

इन्ने चिरै जी कुंवर दौड़ेआ, हत्थ पानी दा लोटा
छिट्टे मारे लच्छु दे मत्थै, सम्मोहन टिक्का धोता
ते टिक्के गी धोंदे गै चमत्कार होई गेआ भाई
जोरै नै करलाई ताई, फ्ही बनी गेई जल्लो ताई।

ते आखदी

केह् गल्ल कुंवर, कु’त्थै लच्छु, कु’त्थै मेरा गोगा निक्का
लच्छु कुंवर गी दिक्खी आखै--  मोआ सौह्‌रा टिक्का।