सिरजनहारा
इ'नें अक्खरें कैसा घेरा पाया हर अक्खर दुये शा सोआया। कोई आखदा में बड़ा प्रचंड कोई आखदा में छड़ा पखंड कोई आखदा ब्ह पुरे दी कोई आखदा में रुत्त बसैंत कोई आखदा में नश्वर आं कोई आखदा मेरा निं ऐंत कोई आखदा…
V
Vikas Mangotra
Writer
इ'नें अक्खरें कैसा घेरा पाया हर अक्खर दुये शा सोआया। कोई आखदा में बड़ा प्रचंड कोई आखदा में छड़ा पखंड कोई आखदा ब्ह पुरे दी कोई आखदा में रुत्त बसैंत कोई आखदा में नश्वर आं कोई आखदा मेरा निं ऐंत कोई आखदा में सोह्गा स्याना कोई आखदा में छड़ा फरैंत। कोई लेई-लेई लोआरे उड़कदा कोई खाई-खाई ठेड्डे लुढ़कदा कोई एह्में गै सड़दा भुज्जदा कोई गुठ्ठा बेहियै किश भुड़कदा कोई गिल्लुए साही मूंढे पलचदा कोई हत्थें शा मेरे छुड़कदा कोई खनकदा ते कोई ठनकदा कोई झुरकदा ते कोई सुरकदा। कोई अत्थरूं खारा होई जंदा कोई पारा-पारा होई जंदा कोई बलदा सूरज होई जंदा कोई त्रुट्टदा तारा होई जंदा कोई खुशबू-खुशबू होई जंदा कोई अलौकी नजारा होई जंदा कोई दुश्मन बैरी होई जंदा कोई मित्तर प्यारा होई जंदा। कोई पांदा नमीं परचोल कुते कोई करदा नित्त मखौल कुते कोई गुंझल-गुंझल होई जंदा कोई पांदा नमें घमचोल कुते कोई बिटर-बिटर दिखदा रौंह्दा कोई बेही जंदा मेरे कोल कुते कोई नीम नशीली गल्लें कन्ने फड़दा हत्थ मेरा डोल कुते। नित्त सोचें दी बारादरियां लग्गे दा रौंह्दा ऐ तमाशा चुप्प चबीता दिखदा रौंह्दा हिलदा-ढुलदा निं बिंद मासां ओह्दा गै आखदे जाया ऐ एह् अक्खरें दा चीख ते झाड़ा 'ॐ' आखदे ऋषि मुनी अक्खरें नादें दा सिरजनहारा। —————————————
