वाह भई, वाह्
अंदर भांबड़ मुहैं हासे कथनी-करनी दा मेल नेईं लोकें गी मत्तां देने शा लगदी तुगी बेह्ल नेईं अंदरें भरी पलीती ऐ गंगा न्हाइयै औन्ना ऐं बड़ा पसोइयै रौह्न्ना ऐं जित्थें मासां परशंसा होंदी दुंब ल्हाइयै…
V
Vikas Mangotra
Writer
अंदर भांबड़ मुहैं हासे कथनी-करनी दा मेल नेईं लोकें गी मत्तां देने शा लगदी तुगी बेह्ल नेईं अंदरें भरी पलीती ऐ गंगा न्हाइयै औन्ना ऐं बड़ा पसोइयै रौह्न्ना ऐं जित्थें मासां परशंसा होंदी दुंब ल्हाइयै बौह्न्ना ऐं । बरत-नत्त तूं रक्खी ले उपनिषद-पुराण रट्टी ले दान-पुन्न बी बड़े गै करना अंदरा फ्ही बी उ’ऐ रौह्न्ना डाह्डे जुल्म बी करना ऐं मंदरें धूफ धखान्ना ऐं बनी-बनी साध भलखान्ना ऐं जित्थें मासां परशंसा होंदी दुंब ल्हाइयै बौह्न्ना ऐं । शब्द-अक्खर तोड़ी-मरोड़ी बड्डे गीत बनान्ना ऐं। ते सुर लाई पुठ्ठे-सिद्धे लोकें गी भरमानां ऐं । वाह्-वाही दे चक्करें च अपने गै गीत गान्ना ऐं नादें दा नाद भलान्ना ऐं जित्थें मासां परशंसा होंदी दुंब ल्हाइयै बौह्न्ना ऐं । गल्लें कन्नै प्हाड़ डोआन्ना कम्म निं करदा चज्जै दा ढोंगी बनियै मैह्ल भरी ले अजें बी तूं नेईं रज्जै दा बड़ी सफाइयैं मुंडी बड्ढना सोचना सब किश कज्जे दा। सम्मना बनी-बनी बौह्न्ना ऐं जित्थें मासां परशंसा होंदी दुंब ल्हाइयै बौह्न्ना ऐं । हस्सी-हस्सी डंग मारना तोपैं-तोपैं जैह्र चाढ़ना कुसै दा रूप-शलैपा दिक्खी कि’यां अपना ल्हु साड़नां दुएं दी सराह्ता सुनियै कि’यां अपनी बिस्स घोलना फि’न्न फलाइयै रौह्न्ना ऐं जित्थें मासां परशंसा होंदी दुंब ल्हाइयै बौह्न्ना ऐं । भांत-भांत दियें डिगरियें अक्ल तेरी भरमाई दी जीने दा निं सूत्तर दिंदी किस कम्म तेरी पढ़ाई बी कूड़ा किट्ठा करदा रौह्न्ना आकड़ किन्नी बधाई दी हीरे-मणियां गोआन्ना ऐं जित्थें मासां परशंसा होंदी दुंब ल्हाइयै बौह्न्ना ऐं ।
