त्रुट्टे दे धागे गंढदे जाएओ

0
370

कुत्ते, काएं ते चिड़ियें दा हिस्सा
कीड़ी-मकोड़ी ते लुढ़ियें दा हिस्सा
धियें, भैनें ते बुड्ढियें दा हिस्सा
बिंद-बिंद हिस्सा बंडदे जाएओ
त्रुट्टे दे धागे गंढदे जाएओ ।

परमार्थ दी करेओ न्हारी
देओ दुएं दे कम्म सोआरी
बूह्‌टें प्रति रक्खो देनदारी
मित्तियै दे कुज्जुएं च भरियै पानी
हर टाह्ल्ली‌ पर टंगदे जाएओ
त्रुट्टे दे धागे गंढदे जाएओ ।

रेहा निं जोका जीने दा थौह्
तुप्पी दी निं लभदी गौ
गौ-बच्छुऐं बिना सुन्ना बेह्‌ड़ा
कुस्सी खलाना दस्सो पेड़ा
बिजन धंदालै सुक्का संघा
सुक्की खंघु कन्नै खंघदे जाएओ
त्रुट्टे दे धागे गंढदे जाएओ ।

बिंद-बिंद हिस्सा सभनें गी थ्होऐ
मुंहां दा माड़ा निं कुसै गी खोऐ
उस दियां ज’ङां -बाह्‌मां चिक्केओ
अंदर बेबु जे मांदी रोऐ
फ्ही सबरै दा आटा गु’न्नियै
हिरखी बब्बरू चंडदे जाएओ
त्रुट्टे दे धागे गंढदे जाएओ ।

LEAVE A REPLY

Please enter your comment!
Please enter your name here