मुंढ डंग

0
207

तम्हूड़ियें दे खक्खरे दी अपनी पछान ऐ
बिस्सु आह्‌ले डंगें इच पीड़ें आह्‌ली जान ऐ
दुंब खड़ी करी बिच्चु माऊ गी खंदे न
सप्पै दे ञ्यानें नस्सी दूर-दूर जंदे न
धरती उप्पर इं’दी बी अपनी गै शान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ।

गांदियां न गीत सुरां लाई चिड़ियां
जंदियां न जान्निया बूरा खाई कीड़ियां
रुक्की-टुक्की खंदियां न त्रिड्डियां लीरें गी
फुट्टी-फुट्टी बौंह्‌दियां न दिक्खी एह् सीरें गी
उड़कने दी इं’दी इक दूरै दी पन्छान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ।

डड्डुएं दी अपनी गै टौह्‌र बक्खरी
इं’दियें बी सुरें दी र्‌होल अक्करी
सप्पें दियां मौजां, डकारें रज्ज लांदे न
मस्त जोआनी इच सूंकां एह् पांदे न
बिच्चुं बी मन्ने दा इं’दा गै मसान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ ।

संघनी बी दाऽ लाना कदें बी नेइयूं छोड़दी
बूह्‌टे नै कलावा पाई दब्बी एह् मरोड़दी
क्रौंकलें दे कुंडे तुस दस्सो कदें छड़ाइयै
गनाह् बी मन्नी दी इं’दी गै भरजाई ऐ
रियूंगल बी डल्लें इच बौंह्‌दा जाई शमान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ।

कोरोना बी डंग मारी छब्ब लाई जा दा
संघी घोटी माह्‌नुऐ दी लम्मे पाई टकाऽ दा
दो मीटर छिंडा रक्खी औना कन्नै जाना ऐ
मूंह् लाई मास्क असें कोरोने गी नसाना ऐ
देश-बदेशैं माह्‌नू कीता परेशान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ

‘कुंडरिये’ गी सदा गै बिस्सु नै मरोड़ेआ
पैरें दा ल्हु मेरा जुक्कें ने नचोड़ेआ
धरती उप्पर जीव कम्म करी चले अपने
जख्में दे गत्त खाल्ली मरी-गले सक्खने
रत्तु कन्नै जिंदगी होई परेशान ऐ
बिस्सु आह्‌ले डंगें इच पीड़ें आह्‌ली जान ऐ
तम्हूड़ियें दे खक्खरे दी अपनी पछान ऐ ।

Previous articleब्हारां
Next articleमच्छर
Abdul Qadir Kundria
Born in the hilly village Kundra of distrct Reasi (Year 1963), Abdul Qadir Kundria is one of the promising dogri poet of Jammu who have written numerous poems which received many accolades from critics and eminent people from literature. His poetry ‘Nassi Duniya Lagi Ae Touna’ has been made the rounds on social media and was appreciated. Under the guidance of Prof. Ram Nath Shastri and Mr. Kuldeep Singh Jandraiya he learned how to frame his words and makes it more readable. He have been to many poet conferences which were telecasted on Doordarshan, and even worked with Prasarbharti Radio Kashmir. A member of Dogri Sanstha, Jammu, he is into poetry since last 35 years. An employee of State Motor Garages Department in the UT of J&K was honoured by different social and political platforms for his eminence in literature. His works have been shared by International Dogra Society, London, Tawi Journal, Reasi Updates and many other social media platforms. His poetry gives a loud and clear message regarding the prevailing situations along with an awareness message to the folks.

LEAVE A REPLY

Please enter your comment!
Please enter your name here