समुद्र-मंथन

0
331

तुगी कु’न्न समुंद्रै मोकला बनाया
कश तेरै दस्स , केह् ऐ अपना
दनां बचारी मिगी सनायां
ठंडे-मिट्ठे नदियें दे नीर
खारी कीती तूं जल-सीर

इक दिन जेकर ऐसा आया
नदियें दे सिर अहं जे छाया
जेकर मंगी भेजन दरेआ
अपना सदियें दा सरमाया
ग्लेशियर जेकर जलकण तुप्पन
तेरा फ्ही केह् रौह्‌ग बढ़प्पन?

अंदर बसदी तेरै बस्ती
लौह्‌के-बड्डे जीबें आह्‌ली
बस्सुआं खज्जल-खोआर होनी
नदियें किश दरेआएं ढोनी
सील-शार्कां हस्ती तुप्पन
तेरा फ्ही केह् रौह्‌ग बढ़प्पन?

सिप्प-मोती जाई बर्फु खुब्भने
सल्ल तेरिया छाती चुब्भने
चन्नै कन्नै चलदी ही जो
तेरी-ओह्‌दी सांझ-भ्याली
बधने-घटने आह्‌ली न्यारी
नेईं रौह्‌नी ओह्‌दे नै यारी
चन्न-चाननी तुगी जे तुप्पन
तेरा फ्ही केह् रौह्‌ग बढ़प्पन?

सक्खना नुक्करा पेदा होना
पक्क ओह् अमृत कलश बी होना
किस्से बी किश उग्घड़ी औने
करदे रेह् जो तप जल-मग्न
तांडव करना चेतें नग्न
चौह्‌दें रत्नें चा इक नेईं शेष
लब्भने ज्हाजें दे अवशेष
विरसे तेरे तुगी जे तुप्पन
तेरा फ्ही केह् रौह्‌ग बढ़प्पन?

तुगी कु’न्न समुंद्रै मोकला बनाया
कश तेरै दस्स , केह् ऐ अपना
दनां बचारी मिगी सनायां
ठंडे-मिट्ठे नदियें दे नीर
खारी कीती तूं जल-सीर।

Previous articleगज़ल
Next articleगज़ल
Promila Manhas
Promila Manhas is known for her poignant style of writing. She has represented Dogri in many National Poetic Symposia. Apart from being a poet of repute she is a newscaster cum translator with Akashwani Jammu. Professionally, she is working with the Department of School Education of the UT of J&K as Lecturer in Botany.

LEAVE A REPLY

Please enter your comment!
Please enter your name here