अजन्मी बच्ची दे मनै दी बेद्धन
पीड़ा-- आ'ऊं रोंदी रेही, करलांदी रेही हत्थ जोड़ियै बास्ते पांदी रेही तुगी दनां तरस नेईं आया, मां हत्थें मेरा कत्ल करांदी रेही। आ'ऊं बी जग्ग च औना चाह्न्नीं मां तेरा दर्द बंडाना चाह्न्नीं अपने जिगर…
R
Ratan Bhardwaj
Writer
पीड़ा--
आ'ऊं रोंदी रेही, करलांदी रेही
हत्थ जोड़ियै बास्ते पांदी रेही
तुगी दनां तरस नेईं आया, मां
हत्थें मेरा कत्ल करांदी रेही।
आ'ऊं बी जग्ग च औना चाह्न्नीं
मां तेरा दर्द बंडाना चाह्न्नीं
अपने जिगर दे टुकड़े गी
अपने हत्थें मार नेईं, मां।
तेरी बसदी दुनिया अंदर
मेरे लेई की थाह्र नेईं, मां ?
आ'ऊं बी जग्ग च औना चाह्न्नीं
मां, तेरा दर्द बंडाना चाह्न्नीं।
जिस मालक ने तुगी रचेआ
उसदी गै आ'ऊं रचना आं
तेरे होंदे उस रचना दा
मुश्किल की ऐ बचना, मां ?
मनै गी बिंद ठनकोरियै दिक्ख
होई गेई की लाचार तूं, मां ?
तेरी बसदी दुनिया अंदर
मेरे लेई की थाह्र नेईं, मां।
आ'ऊं बी जग्ग च औना चाह्न्नीं
मां, तेरा दर्द बंडाना चाह्न्नीं ।
बिच पसारै लक्खां खेड्ढां
खेड्ढी रौनक लाग्गी, मां
तेरे घर जे औङ नेईं तां
कंजकां कुसी बनागी, मां
घर आई दी धी रानी गी
इ'यां नेईं दरकार तूं, मां
तेरी बसदी दुनिया अंदर
मेरे लेई की थाह्र नेईं, मां ?
आ'ऊं बी जग्ग च औना चाह्न्नीं
मां, तेरा दर्द बंडाना चाह्न्नीं ।
पुच्छ उ'नें मामें गी जाइयै
धीआं जि'नें मुहाइयां न
तरसी गे धीएं गी रोई-रोई
अक्खियां बी गुआइयां न
पुत्तरें लेखा तेरे घरै इच
मेरा बी अधिकार ऐ, मां।
तेरी बसदी दुनिया अंदर
मेरे लेई की थाह्र नेईं, मां ?
आ'ऊं बी जग्ग च औना चाह्न्नीं
मां, तेरा दर्द बंडाना चाह्न्नीं ।