गज़ल
अक्खर-अक्खर उसदा उमरां नैनें ब'रदा आया हा बिन होठें, बिन जीह्बा जेह्ड़ा गीत, मना, में गाया हा। रास मना दी सारी लाइयै हिरखी शैह्र बसाया हा सक्खना ठूठा उस शैह्रा ने मेरे हत्थ फड़ाया हा। ना चानन शा…
Susheel Begana
Writer
अक्खर-अक्खर उसदा उमरां नैनें ब'रदा आया हा बिन होठें, बिन जीह्बा जेह्ड़ा गीत, मना, में गाया हा। रास मना दी सारी लाइयै हिरखी शैह्र बसाया हा सक्खना ठूठा उस शैह्रा ने मेरे हत्थ फड़ाया हा। ना चानन शा में हा छिंडै नां गै गास दरेडै हा कंध मझाटै जिस ही चाढ़ी ओह् मेरा गै साया हा। बिन गरजा गै मेरे सौदे मेरी मंडी होंदे रोज उस मेरै ने मेरे अंदर कैसा हट्ट बनाया हा। ना कन्ना ना लामें पाए, ना औंकड़ ना बिंदी गै अक्खर-ब’रका उस कोरै ने कोरा मी फड़काया हा। रमजां मारी मौत गलांदी 'तेरा लगदा आया नेईं'? ऐह्वें गै तूं उसदी मेदा साहें गी बलगाया हा। उसदे चेतें आह्ला सावन नैन 'बगान्ना' दस्सन केह् किन्ना घिरेआ, किन्ना ब’रेआ, किन्ना होर बकाया हा।
