अक्खर

0
356

अक्खर स्पर्श बनियै गरमैश दिंदे न
प्यार दे निग्घे जिसमै दी गरमैश
किश अक्खर खशबो बनी जंदे न
प्यार दे निग्घे साहें दी खशबो
ते किश लुग्ग-बलुग्गे अक्खर
अनमिट भुक्ख ते त्रेह् दिंदे न
ओठें, अक्खें,पूरे जिसमै गी
ते किश अक्खर अक्खीं च तरदे-तरदे
दिलै दी सारी मनशा दस्सी ओड़दे न
बगैर किश बोल्ले दे

भाएं ओह् अक्खर किन्ने गै रूपें च ढले दे होन
कुसै बी रूपै च होन
सुक्क-मसुक्के
जां किन्ने गै तरपिन्न होन
जां किन्ने गै गिल्ले
जां किन्ने गै डूंह्‌गे डुब्बे दे होन
किन्नी गै भ्रांतियें, गलतफैह्‌मियें दे शकार होन
किन्ने गै टल्लें इच लपटोए दे होन
जां किन्ने गै निरवस्त्र
नग्न
प्रेम दे अक्खर
प्रेम दे अक्खर ।

LEAVE A REPLY

Please enter your comment!
Please enter your name here