बांदी रुत्त

जदूं ब्हार बसैंती होंदी ऐ 
बक्खरी मन खुशी भरोंदी ऐ।

सुस्ती राहें मस्ती चली चलै 
नस-नस बिच नींदर ढली चलै 
बड़ी सोह्नी ते मन भानी ऐ 
रुत्त बांदी अत्त सुहानी ऐ 
गासै पर पौंदियां पींघां न 
ते पक्खरुएं दियां रींघां न 
खुशी मूहां नेईं बलोंदी ऐ 
जदूं ब्हार बसैंती होंदी ऐ।
      
बडलै गै नींदर तज्जन एह् 
परभात फेरी कड्ढन एह् 
जदूं सुनचन बूह्टें बोल्लै दे 
कन्नें बिच मिशरी घोलै दे 
जदूं होंदा बिंदक न्हेरा फ्ही 
बूह्टें पर करन बसेरा फ्ही 
दिनै कोयल सुरें भरोंदी ऐ 
जदूं ब्हार बसैंती होंदी ऐ 

कदें बदल दपैह्री छांदे न                                  
खबरै कत्थुआं दा औंदे न 
फ्ही छप्पियै सूरज औंदा ऐ 
ते इंदर धनख बनांदा ऐ 
रिश्में दे तीर चलाइयै फ्ही 
बदलें गी मारै ढाइयै फ्ही 
तदूं कनमन झट खड़ोंदी ऐ 
जदूं ब्हार बसैंती होंदी ऐ।
        
जदूं धुप्प दना क भखदी ऐ 
चिड़ी कक्ख आह्लड़ै रखदी ऐ 
हर डाह्ल्ली कूली-कूली ऐ 
बेही करदा कांऽ करूली ऐ 
पैंछी सब खुशी मनाऽ करदे 
बेही बूह्टें बैंस्स बधाऽ करदे 
नीं गास टटीह्री रोंदी ऐ 
जदूं ब्हार बसैंती होंदी ऐ।

गासै थमां बदल नस्सी गे 
प्हाड़ें पर जाइयै बस्सी गे 
अज्ज चिक्कड़ गारा मुक्की आ 
पशुएं दा थाह्र बी सुक्की आ 
खुरली बिच मता निं ओखर हुन 
पशुएं गी नां गै मोह्खर हुन 
हिरदे बिच खुशी भरोंदी ऐ 
जदूं ब्हार बसैंती होंदी ऐ।
            
चलै नाड़ू-नालें सूटें च 
जीवन होई रुक्खें-बूह्टें च 
मूंह् चन्नै ब्हानै दसदी ऐ 
फुल्लें बिच खिड़-खिड़ हसदी ऐ 
मां बनियै लोरी गांदी एह्
भौरें बिच रुनझुन लांदी एह् 
 नित्त खितज सनैह्री न्हौंदी ऐ 
जदूं ब्हार बसैंती होंदी ऐ ।

बदलाऽ नेहा किश औंदा ऐ 
जदूं मौसम होंदा बांदा ऐ  
गर्मी ते नां गै ठार होऐ 
कदें धुप्प ते कदें फुहार पवै 
टपरें पर टन-टन सुनने दा 
मजा आवै सुखने बुनने दा 
मूंह् रोज तरेलू धोंदी ऐ 
जदूं ब्हार बसैंती होंदी ऐ।
         
होंदा कदें पलै च गड़गड़ जन 
धुप्पै बिच होंदा झड़ झड़ जन 
ब्हा चलदी ऐ कदें पर फर जन 
गासै पर पक्खरू सर सर जन 
करदे न नेहा कमाल कदें 
उडदे लै बदलन चाल कदें 
 एह् दौलत अदूं गै थ्होंदी ऐ 
 जदूं ब्हार बसैंती होंदी ऐ।

कदें धुप्प निकलदी चम चम जन 
पौंदी फुहार कदें छम-छम जन 
कदें खड्डें बगदी छर-छर जन 
बदलें दा रौंह्दा डर-डर जन 
लगदी एह् सब गी चंगी ऐ 
रुत्त बांदी किश दरंगी ऐ 
धुप्पै बदलें बदलोंदी ऐ 
जदूं ब्हार बसैंती होंदी ऐ।
          
जदूं फुल्ल चबक्खी खिड़दे न 
फुल्लें नै भौर जदूं भिड़दे न 
सुर पक्खरुएं दे छिड़दे न  
पिड़ छड्डी बदल जदूं थिड़दे न 
सिट्टे कनकू दे निस्सरदे न 
सत्त रंगें अदूं बनोंदी ऐ
जदूं ब्हार बसैंती होंदी ऐ ।
————————————————