देवनागरी बनाम टाक्करी
तुं'दी ऐ मड़ो डोगरी भाशा मात्तरी फ्ही होऐ देवनागरी जां लिपि टाक्करी । लिपि ऐ छड़ी माध्यम मंजिल बनाओ निं रक्खो निशाना साधियै मंजिल खंझओ निं रक्खो लक्ष्य धारियै जे पुज्जना ऐ तोड़ साधन गी समझो गौण जे…
Bansi Lal
Writer
तुं'दी ऐ मड़ो डोगरी भाशा मात्तरी
फ्ही होऐ देवनागरी जां लिपि टाक्करी ।
लिपि ऐ छड़ी माध्यम मंजिल बनाओ निं
रक्खो निशाना साधियै मंजिल खंझओ निं
रक्खो लक्ष्य धारियै जे पुज्जना ऐ तोड़
साधन गी समझो गौण जे साध्य दी ऐ लोड़
मंजिल गै पैह्ली पौढ़ी समझो मंजिल आखरी
फ्ही होऐ देवनागरी जां लिपि टाक्करी।
निशाना जित्थै लाना उत्थै अक्ख रक्खो तुस
ऐरी-गैरी गल्लें ई म्हेशां बक्ख रक्खो तुस
चढ़दी कलाएं च डोगरी निं समझो अस्त ऐ
जम्मू चा निकलियै पुज्जी दी इंद्रप्रस्थ ऐ
डुग्गर दे भाशियें दी डोगरी जन्म दातरी
फ्ही होऐ देवनागरी जां लिपि टाक्करी।
देवनागरी दी पौढ़ी चढ़ी गेई डोगरी
चौह्बी देवें दी सभा च दाड़ी गेई डोगरी
होंदा माध्यम सशक्त जो दुआंदा लक्ष्य ऐ
माह्नू गी लैना लोड़चदा उस्सै दा पक्ष ऐ
हुन दस्सो कि'यां डोगरी नीं सकदी आकड़ी
फ्ही होऐ देवनागरी जां लिपि टाक्करी।
तुस दस्सो अज्ज डोगरी गी कैह्दी गर्ज ऐ
अठमें शड्यूलै इंदर दी सभा च दर्ज ऐ
भाशा च लोक संस्कृति ऐ भाव ते विचार
लिपि ते छड़ी दिंदी मड़ो शब्दें गी आकार
जे थ्होई जा बाह्न शैल तां की टुरन यात्री
फ्ही होऐ देवनागरी जां लिपि टाक्करी।
लेई रूप जेह्दा पुज्जी अज्ज पार डोगरी
कि'यां बदली लै अज्ज एह् नुहार डोगरी
एहसान फरामोश नेईं ऐ इन्नी डोगरी
किश लोक समझा करदे न फ्ही जिन्नी डोगरी
स्वीकार कि'यां करै फ्ही कुसै दी चाकरी
फ्ही होऐ देवनागरी जां लिपि टाक्करी।
—————————————————— 