ढाई अक्खर
जम्मू शैह्र च ढाई अक्खर प्रेम दे बी ढाई अक्खर जोड़ आखो जां आखो संजोग इ'नें अक्खरें दी गै सारी टक्कर। नेहा कमाल दसदे ढाई अक्खर स्नेह-प्यार दा चलाइयै चक्कर इ'यां न घुलदे जि'यां खंड-घ्यो अग्गें झुकदे…
R
Rachna Vinod
Writer
जम्मू शैह्र च ढाई अक्खर
प्रेम दे बी ढाई अक्खर
जोड़ आखो जां आखो संजोग
इ'नें अक्खरें दी गै सारी टक्कर।
नेहा कमाल दसदे ढाई अक्खर
स्नेह-प्यार दा चलाइयै चक्कर
इ'यां न घुलदे जि'यां खंड-घ्यो
अग्गें झुकदे बड्डे-बड्डे अक्खड़।
मिट्ठे बोल्लें च सभनें दा हुनर
गली'-ग'ली, कूचै-कूचै, नुक्कर-नुक्कर
अपनें कन्नै ते हिरखी बनदे
बगान्नें दी बी करदे मती गै कदर।
एह् कर, ओह् कर
केह्-केह् नेईं कर
ढाई अक्खरें च करी खरी गल्ल
मां वैष्णो अग्गें सिर झुकाइए
नेहा उच्चा सभनें दा मनोबल।
इक शा इक शैल-सुनक्खड़
सुच्चे, स्याने, खरे मोह्तबर
खलाड़ी, कलाकार जां लखारी
आई गै पुज्जे इत्थूं तक्कर।
--------------------