मेरी मां
मेरी मा! कुसै 'कैम्ब्रिज यूनिवर्सिटी' दी जां फ्ही कुसै 'हार्वर्ड़ बिजनस स्कूल' दी विद्यार्थी नेईं ही। ते ना गै दिक्खेआ हा 'दून' जां 'सनावर' स्कूलै दा मूंह् उसने। उस कश नेईं हा राजनीति जां अर्थ शास्त्र…
A
Ashok Khajuria
Writer
मेरी मा! कुसै 'कैम्ब्रिज यूनिवर्सिटी' दी जां फ्ही कुसै 'हार्वर्ड़ बिजनस स्कूल' दी विद्यार्थी नेईं ही। ते ना गै दिक्खेआ हा 'दून' जां 'सनावर' स्कूलै दा मूंह् उसने। उस कश नेईं हा राजनीति जां अर्थ शास्त्र दा ग्यान कोई ना उन्न पढ़े दा हा समाज शास्त्र दा विग्यान कोई। ओह् ना ते डाक्टर ऐ, ना इंजीनियर। न काशी जाई पढ़े हे वेद शास्त्र उसने! ञाह्रें ब'रें दी ब्होई ही घर-घ्रिस्ती दे घराटै दे पीह्नै च प्होई ही। उ'आं टोकमें अक्खरें च जोड़ करी- करी पढ़ी लैंदी ऐ रमैन ते गीता। मी सुआलदे बाची लैंदी ही हनुमान चलीसा। बशक्क अनपढ़ ऐ पर बाकमाल ऐ-- उस अन्नपूर्णा दी रसोई दा सुआद! मां- बोल्ली दे तराम दी मठास! उसदे क्हीमी नुक्से! औखी भारी च- उसदा हठ! उसदा निश्चा ! उसदा नीति- ग्यान! बरतन-व्यहार च उसदी 'ऐम्म बी ए' तंगी -तुर्शी च घर चलाने दा उसदा अर्थ शास्त्र! उसदी सोशल इंजीनियरिंग! म्हल्लेदारी च डिप्लोमेसी! मेरी मां मां गै नेईं ओह् पुल ऐ जोड़दी ऐ रिश्तें गी त्रुट्टे-भज्जे दे कंढें गी त्रुट्टी दी तंदें गी। में सोचनां! दुनिया दी हर अनपढ़ मां- इक स्कूल आफ थॉट्स ऐ। टुरदी-फिरदी युनिवर्सिटी ऐ।
