ओह् मलाटी
मेरी-तेरी मलाटी, जिंदे सौन-भाद्रो दे ठंडे फनाके आंह्गर ही इक फराटी बस, आया ते सकून देइयै बरधी गेआ ते पिच्छै छोड़ी गेआ हुम्म ते गु'म्म । जिंदे! तेरे मंदे नै मन बड़ा हुस्सड़ेआ तेरे नेहा होर कोई नेईं हा…
A
Ashok Khajuria
Writer
मेरी-तेरी मलाटी, जिंदे सौन-भाद्रो दे ठंडे फनाके आंह्गर ही इक फराटी बस, आया ते सकून देइयै बरधी गेआ ते पिच्छै छोड़ी गेआ हुम्म ते गु'म्म । जिंदे! तेरे मंदे नै मन बड़ा हुस्सड़ेआ तेरे नेहा होर कोई नेईं हा जुड़ेआ। उ'आं धखाड़ा तेरी आंदरें च बी हा उस सलगी दा पर समें दी ठार भन्न लाई गेदी ही उ'नें मके दे ङारें गी । समें दा बा-बलूह्ना करी गेआ खिंड-बिंड असेंगी पर समें दा हकारा फ्ही खेढी गेआ खेढ जीवन दे खीरले सफर च दुनिया दी इस भीड़ा च इक बारी फ्ही कराई गेआ संजोगी मेल। अक्खां मिलियां रीझां खिड़ियां मेदां बिढ़ियां परानी पीड़ां छिड़ियां। न में कूएआ न ओह् कूई बस अक्खें-अक्खें गल्ल होई। पर साढ़े मुहांदरे दी झुरड़ियें दे बाहें चा बगी गेदे हे चन्हां दे हाड़ केईं ते लंघी गेदे हे बछोड़े दे मौसमें दे पूर केईं। जिंदे, शांत-खड़ुत मनै दे सरै च कैह्सी खलबली मचाई? फ्ही बी सकून कन्नै तरपिन्न ही ओह् खीरली अल-बिदाई !
