तूं बी मौसम होई जा
कलापे दे कोप-भौना च अ'ऊं जरै करदा हा पीड़ां ते भोगै करदा हा जून अपनी। मेरे ताईं बज्जी दियां हियां काह्रां ते सुक्कम-सुक्कियां हियां हिरखी सारां। कुसै बी आई मेरा भित्त नेईं ठ्होरेआ कोई निं बौढ़ेआ ।…
A
Ashok Khajuria
Writer
कलापे दे कोप-भौना च अ'ऊं जरै करदा हा पीड़ां ते भोगै करदा हा जून अपनी। मेरे ताईं बज्जी दियां हियां काह्रां ते सुक्कम-सुक्कियां हियां हिरखी सारां। कुसै बी आई मेरा भित्त नेईं ठ्होरेआ कोई निं बौढ़ेआ । फ्ही सोच्चेआ-- छोड़ मना भरम-भलेखें गी इ'नें गुंझले भेतें गी भांऽ न कोतरा-सौ रिश्ते तेरे कुसै नेईं आई करने मनौतरे तेरे खोह्ल आपूं गै भितली कोई फुल्लें दी कश्बोई नै न्हाती दी औन दे अंदर तितली कोई। अहा! में बाह्र झांती मारी ब्हारें दे शगुफ्ते हे अक्खियें दे रज्ज हे छलैपे अनछूह्ते हे। मौसमें दे तरान्ने हे मौसमें दे नजराने हे मौसमें दे गीतड़ू हे मौसमें दे अफसाने हे कलियें नै भौरें दे लग्गे दे हे घोल अहा! क्या यराने हे! ओहो ! में ते कैद हा अपनी गै केदै च मेरे ताईं एह् जलबे बगान्ने हे एह् छलैपे बरान्ने हे। में घोखेआ-- तूं ऐह्में अंदर बैठा दा हा पाड़ै ते कट्टै करदा हा सोगें दा ल्हूतन । जोबन भारें लदोई दी हार-शंगारें शंगरोई दी मौसम रानी ने मी गलाया "मड़ा! बदलोंदे मौसमें तूं बी बदलोई जा मौसमै कन्नै मौसम तूं बी होई जा।”
