अज्जै दी मानसिकता
बिन सुआर्थ दे कदें नेईं लड़ना स्हेई गल्लै पर बी नेईं अड़ना हद्द शराफत दी तुस करी लैओ होऐ जिन्ना बी जुल्म जरी लैओ सैह्नशक्ति दा चोला लाई लैओ बुझदिली गी बोझै पाई लैओ । जबरन करै जनाह् कोई आकड़ै दिक्खो…
Bansi Lal
Writer
बिन सुआर्थ दे कदें नेईं लड़ना
स्हेई गल्लै पर बी नेईं अड़ना
हद्द शराफत दी तुस करी लैओ
होऐ जिन्ना बी जुल्म जरी लैओ
सैह्नशक्ति दा चोला लाई लैओ
बुझदिली गी बोझै पाई लैओ ।
जबरन करै जनाह् कोई आकड़ै
दिक्खो मनुक्खता धरी ताकड़ै
कुसै दी अग्गी कदें नेईं सड़ना
बिन सुआर्थ दे कदें नेईं लड़ना ।
करदा जो कोई, करन देओ उस्सी
कुसै नै लड़दा, लड़न देओ उस्सी
कदें नेईं सज्जनो किट्ठे होना
जदूं ढौना सदा इक्कले ढौना
तुस बेन्यांई गी गलै नै लाओ
बारी- बारी तुस मरदे जाओ
सदा बुझदिली दा झंडा फड़ना
बिन सुआर्थ दे कदें नेईं लड़ना ।
चाढ़ी लैओ शराफत दा मर्हक्खा
कायरता गी मारी लैओ जफ्फा
बशक्क कोई आखै तुसेंई नीच
बदलनी कदें नेईं अपनी नीत
शख्सीयत कदें बी जे जाs बदली
नसल जाs बदली सज्जनो अगली
इस्सै लेई असें कदें निं अड़ना
बिन सुआर्थ दे कदें नेईं लड़ना ।
करदा एके दी माह्नू पन्छान
नेईं रौंह्दा चीन दा नांऽ-नशान
माह्नू इकजुट होई खड़ोई जाs
कुदरत की नेईं कन्नै होई जाs ॽ
जे इक झंडे हेठ जाह्न खड़ोई
फ्ही धौंस जमाई जाs कि'यां कोई
कुसै गी पवै निं कुसै शा डरना
बिन सुआर्थ दे कदें नेईं लड़ना ।
मड़ो, देश न जिन्ने बी बक्ख- बक्ख
होई जाह्न किट्ठे, भां करन निं कक्ख
फ्ही मरी जाs चीन दी दिक्खियै मत्त
जाह्न फ्ही भुल्ली उस्सी पंज- सत्त
पेई जाऽ उसगी फ्ही नेही नकेल
जदूं माल होग निं बिंद बी सेल
की बिन मतलब डरी- डरियै मरना ॽ
बिन सुआर्थ दे कदें नेईं लड़ना
………………………………………………………………………………. 