जमात करामात
भाई-चारे एके आह्ली त्रुट्टी गेदी डोर कल्ला होइयै माह्नू पेई गेदा कमजोर आखदे स्याने बौंह्दा ढेरा 'र स्याना मता तां गै बदमाशें दा समाजै बिच ऐ जोर । कुसै दी निं गल्लै बिच अज्ज कोई पौंदा ऐ अपने घरै च…
Bansi Lal
Writer
भाई-चारे एके आह्ली त्रुट्टी गेदी डोर
कल्ला होइयै माह्नू पेई गेदा कमजोर
आखदे स्याने बौंह्दा ढेरा 'र स्याना मता
तां गै बदमाशें दा समाजै बिच ऐ जोर ।
कुसै दी निं गल्लै बिच अज्ज कोई पौंदा ऐ
अपने घरै च माह्नू कल्ला होइयै रौंह्दा ऐ
कोई बदमाश कुसै ई मारी जाऽ ग’ली बिच
कदें बी निं बुजदिल माह्नू बाह्र औंदा ऐ।
घनी ऐ अबादी भाएं शैह्र न बिरान अज्ज
घर-घर कल्ला माह्नू होआ परेशान अज्ज
दिली हिरख, एका अज्ज दिलें चा मुक्केआ
तां गै बदमाश बनी फिरै दा ऐ साह्न अज्ज ।
मत-भेद सारे तुस अपने मटाई लैओ
दरी इक झंडे हेठ सारे बछाई लैओ
आपसी विचारें गी इक पास्सै रक्खियै
दिलें च एकता दे बीऽ तुस राही लैओ ।
एके आह्ला सूरज जे इक बारी चढ़ी जाऽ
न्हेरे दा फ्ही बदमाश केह् मजाल अड़ी जाऽ
सारे लोक मिलियै कदें किट्ठे होई जाह्न
निकलेआ जित्थूं बदमाश उत्थै बड़ी जाऽ ।
देश सारे इस्सै मानसिकता दे शकार न
चीन अग्गै तां गै सु'ट्टी बैठे दे थेहार न
कथनी ते करनी उं’दी बक्ख- बक्ख ऐ
अंदरा दा किश होर, लभदे किश बाह्र न।
लॉकडाउन लाज नेईं ऐ, ना गै वैक्सीन
किट्ठे होन सारे दिखदा रेही जाऽ फ्ही चीन
समां ते तरीक गुम-चुप सारे तै ऽ करियै
करी सु'ट्टन चफेरे दा फ्ही- एक दो तीन ।
जि'दे बिच एका रब्ब उं’दे नै खड़ोई जाऽ
कि'यां यारो उं’दा फ्ही बाल बांका होई जाऽ
किश बी निं करने दी लोड़ फ्ही पौंदी ऐ
इक जुट होइयै इक बारी ओह् खड़ोई जाऽ ।
लोकें बिच एकता दी लैह्र जे समाई जाऽ
बड्डे- बड्डे खुंघें दी ठकानै मत्त आई जाऽ
अक्खीं नजैज फ्ही कि'यां कुसै ई दस्सै कोई
कि'यां बदमाश फ्ही कुसै ई कोई ढाई जाऽ।
सांझे कम्मै गित्तै, मड़ो म्हेशां तुस किट्ठे र'वो
इ'यां भां बेशक जाई बक्ख- बक्ख तुस ब'वो
दुश्मन करै जे खराबी कदें तुं'दे कन्नै
इकजुट होइयै उस बेल्लै सारे तुस पवो ।
किट्ठा कदें कदम जे सारें दा पटोई जाऽ
उं’दे गै मताबक फ्ही म्हौल सारा होई जाऽ
भां करन निं कक्ख, छड़ा करन खड़ा हत्थ
सत्ता सरकार दी बी की नेईं बदलोई जाऽ। 